يسرية محمد الحسن
هيام المغربي عروس السماء قومي اصحي...!!
وانا في منامي العميق ذاك عصر يوم ماطر جميل وهي ممسكه بيدي تشدني
فتحت عيني لاجدها امامي وعيناها المبتسمتين تنظران الي بكل الحب !!.عامله كده زي هيام لابسه جلابيتك بالقلبه وشعرك منكوش !!وانا اجذب نفسي من غفوه نعاس ما زالت ممسكه بكل مفاصل جسدي عانقت ابتسامه طفرت من ثغري محياها الصبوح يا الله يا هيما والله انا تعبانه قومي عالي عندي ليكي احلي كلام نهضت من الفراش وكالفراشه امامي تخطو بخطوها الرشيق نحو منامه الشقه وانا اتبعها بخطو ما زال متثاقلا بفعل نعاس لم يفارق عيني ولم يبارح تاثيره جسدي !!اقعدي انتظريني شويه اغسل وجههي بالماء البارد لاصحو لك تماما هكذا قلت لها. لتضحك كغرر الطفوله ضحكتها المجلجله العذبه تلك !!.قبل ان اخرج اليها اعددت كوبين من الشاي ذي اوراق نبات النعناع الذي تحبه كثيرا ولم اصل بعد الي الباب المفضي الي المنامه ليجيئني صوتها الغريد يا سلااام علي ريحه النعناع الرائعه تصدقي قلت امشي اعملو براي لحدي ماتجيني. لقيتك كعادتك سبقتيني بشايك الظريف !!
وصلت اليها لم تنتظر ان اضع صينيه الشاي امامها مدت يدها واخذت كوبا ورشفت منه يا الله دائما اجد قدمي تسوقني اليك لاني احبك واحب شايك المنعنع له طعم عندك عجيب والله قبلتها بعد ان وضعت صينيه الشاي انا ذاتي ياهيام بحبك اكتر من حبك لي تعانقنا. وجلست قبالتها. نحكي ....!!!طار النعاس من عيني وطار معه حلم القيلوله الذي حسبته حقيقه من قوه سيطره تفاصيله علي عقلي الباطن !!انا جايبا ليك احلي خبر !!انتي مين غيرك بيجيب الاخبار الحلوه...!!.عندي ليك. عريس وضحكت ضحكتها الحلوه تلك المنبعثه من اعماق قلبها.
وواصلت حديثها...الحقيقه.رسلني الجزلي اكلمك وقال كفايه غياب تجي بكره ضروري. عشان عاوزك في الموضوع ده....!! اتسعت ابتسامتي بادي الامر مع ارتفاع حواجب دهشتي وضحكه مكتومه اعتملت في صدري عليك الله ياهيام ياهو ده الكلام الصحيتيني عشانو ؟وهو في كلام احلي من ده ؟ولا انتي زي ما قال استاذ الجزلي عاوزه تقنعينا انك حتعيشي عمرك كده !!ده عريس مش اي كلام ...النوع البنفع معاك تماما والبشبهك.!!ثقافه.وعائله ومركز والاهم من ده كوولو انو بيعيش نفس ظرفك. يعني سبق له الزواج وله بنتان وولد وقال مش عاوز عيال اصلي عارفاك مش عاوزه تنجبي لو ربنا اداك ود الحلال !!.كل هذا الكلام رمته علي مسامعي وانا اضع يدي علي خدي وابتسم وانظر لها !!عمر بدل ما يرهق نفسو بالبحث لي عن عريس طيب ما يقنعك انتي بالشباب اللي زي الورد. الي رفضتي اي واحد فيهم !!صدقي يا يسريه اتكلم معاي كتير خالص وانتي عارفه لسه ما جه الفي راسي !!!قالت ذلك وضحكت ضحكتها الحلوه كانت دائما تقول لي ذلك واضافت وبرضو لسه بدري. لم ابلغ العمر ذا الشاره الحمراء بعد .!!ضحكنا سويا ونحن نرفع كوبي الشاي لنستمتع معا بالرشفه الاخيره !!..تحدثنا كثيرا عن التلفزيون وهنا ام درمان الحبيبه..وتطرقنا الي نشرات الاخبار وسهراتنا التي أعددناها سابقا وتم بثها واعدنا ذكريات ايامنا الاول علي عتبات الاعلام المرئي والمسموع وكيف كنت احسها علي الانضمام معنا في كشوفات العاملين وكيف يكون تبريرها الرافض للفكره انا ما بحب القيود يا يسريه هكذا كانت تقابل الحاحي عليها عملي الحر يدر عليا اموالا وفيره سافقدها اذا تقيدت بالوظيفه خليني كده احسن متعاونه في الجهازين. اقرا معاكم الاخبار واعد وانتج واقدم برامجي بمزاااجي عرفه عارفه استاذ عمر كلمني من اول امس اجيكي لانك ما بتردي علي التلفون. وامس بعد المغرب وكعادتنا كل مساء انا وليلي. بناخد وضاح وصبوح ورزان. اولاد ليلي بنمشي. ناكل ايسكريم بنوقف العربيه في المسار التاني. ماجنب محل الايسكريم وبعيد من العيون نتي عارفه النجوميه في البلد دي فاتورتها خصما علي راحتك وحياتك الشخصيه يعني ما بنقدر نقعد مع الاطفال زينا زي بقيه خلق الله لنستمتع كاسره مع بعضنا عشان كده بنوقف العربيه بعيد انا وليلي بجوارها ناكل في الايسكريم.والاولاد يجلسوا في الجلسه بتاعه المحل. ياخدو راحته .الاستوديو الجنب محل الايسكريم الظاهر كانت فيهو عروسه. كان هناك. مجموعه من النسوه وبعض الشباب. بعد شويه. وانا وليلي في مكانا داك. في الشارع المقابل المحل خرج العريس وعروسه بعد ما اخدو صور الزفاف طلعوا من من الاستوديو ومعاهم الشبينات رافعين ذيل فستان العروسه ...ما كانو بيزغردوا !!.ليلي قالت لي شوفي يا هيام ماقاعدين يزغردوا ليها تعالي نزغرد ليها قمنا انا وليلي من مكانا داك زغردنا ليها زغروده كبيره ...
بقو يتلفتوا محل الصوت الجاي بشر لينا العريس من بعيد والشباب المعاهو بدون ما يعرفونا او يتبينوا ملامحنا لاننا في مكان الاضاءه فيهو ضعيفه خوفا من فضول الاعين والناس !! تصوري العدوي انتقلت بسرعه للبنات الشبينات. الما كانو بيزغردوا. وبعض النسوه في محل الايسكريم فانطلقت الزغاريد لتنفرج اسارير العروس والعريس. ليبادلوا الكل. ابشر ابشرووا...!!.ياسلاااام ياهيام. قادره اتخيل المشهد تماما قدام عيوني. وكيف. قدرتو تدخلوا البهجه والفرحه في قلبي العروس والعريس بمشاركاتكما لهما بالزغاريد دون معرفتكما بهما يالروعتك انتي وليلي !!سرح بي الخاطر حيث مواقف مماثله كثيره عشتها معهما الاثنتين !!....كم هن جميلتان. ورائعتان....!!!!...
غدا نواصل....
